سيادة الرئيس
كلامك يخلى الحياه هردبيس
يخلى الطراوه هتقلب فطيس
وفرحان هيقلب بفضلك تعيس
سيادة الزعيم
ياغايب ودايب فى فرش النعيم
وسبت الغلابه فى ايد اللئيم
هتقلب بعوجه وما تستقيم
سيادة الهمام
وفاكر زعامتك شوية كلام
وعايز نقول لك يافندم تمام
ومالك فى اهلك خير او سلام
وبس الاعادى لهم الابتسام
سيادة الامير الفخيم الجليل
وصاحب رياده وصاحب جميل
وشعبك مايلقى اقل القليل
دوام السياده امل مستحيل
وياريت سيادتك بقى تستقيل
ويبقى لجنابك شكرٌ جزيل
**********
سيادة الرئيس
قلبت الحكاية على دماغ الغلابه
هم اللى غلطوا وهم الهبابه
واه يا وطن ماحدش فاضيله
وانت تحاول عشانه النهوض
وهما فى طينه وشاريين ترابه
ده غلبان معفر
وعاجز مكسر
مخاخهم فى نظرك تلهيها كوره
وذمه شبهها حرامى الماسوره
ولولا وجودك يروحوا فى حديد
طب ادى ايديه ماددها لايديك
انا من مكانى بنادى عليك
بقول السواعد كتيره وقويه
وخير البلد دى انا استاهله ليا
وهات لى عمل
وانا اديك امل
ولو مش فى ايدك تدقق وتتعب
ومش لاقى حيله غير ان انت تنهب
يبقى تسيب المكان واستقيل
وانا اللى حاسبنى جربوع فقير
هاثور عالبطاله وهعوض كتير
واشوف لى مجاهد برأيه استنير
ويبقى رئيسى وابقى له خير
وبكره ميزان الحق العليل
هيعلا وعمره مايرجع يميل
ويللا بقى ماتروح تستقيل
ليست هناك تعليقات:
إرسال تعليق